The lyon and the tyger lang maintain'd
A bloody weir. At last the lyon gain'd.
The royal victor strak the earth with aw
And the four-footed world obey'd his law.
Fra ilka species deputies were sent
To pay their homage due and compliment
Their sovereign liege, wha'd gart the rebels cour,
And own his royal right and princely power.
After dispute, the moniest votes agree
That Reynard should address His Majesty,
Ulysses like, in name of a' the lave.
Wha thus went on: "O Prince, allow thy slave
To roose thy brave atchievements and renown.
Nane but thy daring front shou'd wear the crown,
Wha art like Jove, whase thunderbowt can make
The heavens be hush and a' the earth to shake;
Whase gloom, if he but angry nods,
Commands a peace, and flegs the inferior gods.
Thus thou, great king, hast by thy conqu'ring paw
Gi'en earth a shog and made thy will a law.
Thee a' the animals with fear adore,
And tremble if thou with displeasure rore.
O'er a' thou canst us eith thy sceptre sway,
As badrans can with cheeping rottans play."
THIS sentence vex'd the envoy rottan sair.
He threw his gab and girn'd, but durst nae mair.
The monarch pleas'd with Lowry, wha durst gloom?
A warrant's order'd for a good round sum,
Which Dragon, Lord Chief Treasurer, must pay
To sly tongu'd Fleechy on a certain day.
Which Secretary Ape in form wrote down,
Sign'd Lyon, and a wee beneath, Baboon.
'Tis given the fox. Now Bobtail Tap o' kin,
Made rich at anes, is nor to had nor bind.
He dreams of nought but pleasure, joy and peace,
Now blest with wealth, to purchase hens and geese,
Yet in his loof he hadna tell'd the gowd.
And yet the rottan's breast with anger glow'd.
He vow'd revenge and watch'd it night and day.
He took the tid when Lowry was away
And throw a hole into his closet slips.
There chews the warrant a' in little nips.
Thus what the fox had for his flatt'ry gotten,
Ev'n frae a lyon, was made nought by an offended rottan.
The lion an the tyger lang mentained
A bluidie weir. At last the lion gained.
The rial victor strak the earth wi aw
An the fower-fittit warld obeyed his law.
Fra ilka species deputies war sent
Ti pay thair homage due an compliment
Thair sovereign liege, wha'd gairt the rebels coor,
An awn his rial richt an princely pooer.
Efter dispute, the moneist votes agree
That Reynard shoud address His Majesty,
Ulysses like, in name o aw the lave.
Wha thus went on: "O Prince, alloo thy sclave
Ti roose thy brave atchievements an renoon.
Nane but thy darin front shoud wear the croon,
Wha airt like Jeuve, whase thunderbowt can mek
The heivens be hush an aw the earth ti shek,
Whase verra gloom, yif he but angrie nods,
Commands a pace, an flegs the inferior gods.
Thus thou, gret king, hast bi thy conqu'rin paw
Gien earth a shog an made thy wull a law.
Thee aw the ainimals wi fear adore,
An tremmle yif thou wi displeesur rore.
Ower aw thou canst us eith thy sceptre sway,
As badrans can wi cheepin rattons play."
This sentence vexed the envoy ratton sair.
He thrue his gab an girned, but durst nae mair.
The monarch pleised wi Lowrie, wha durst gloom?
A warrand's ordered for a guid roond soum,
Whilk Dragon, Lord Chief Traisurer, must pey
Tae sly tungd Fleetchy on a certaint day.
Whilk Secretary Awp in furm wrote doon,
Signed Lion, an a wee anaith, Babboon.
'Tis gien the fox. Noo Bobtail tap-o-Kin,
Made rich at yince, is nor ti had nor bin.
He dreams o nocht but pleisur, joy an pace,
Noo blest wi walth, ti purchase hens an gace,
Yet in his loof he hadna telled the gowd.
An yet the ratton's breist wi anger glowed.
He vooed revenge an watched it nicht an day.
He teuk the tid whan Lowry wes away
An throwe a hole intil his closet slips.
Thare chowes the warrand aw in little nips.
Thus what the fox haed for his flatt'ry gotten,
Ev'n frae a lion, wes made nocht bi an offendit ratton.